Stad kommune skal ha høge ambisjonar for klima, natur, og miljø, og ta sitt forvaltaransvar på alvor. Vi ønskjer ressursar og effektive tiltak som stettar måla verdssamfunnet har sett for å stanse klimaendringane og tap av naturmangfald. Stad skal jobbe for å omstille seg til eit nullutsleppsamfunn på alle samfunnsområde, innan 2030.

Kommunar som vil lukkast med vekst og utvikling må vere samhandlande, ambisiøse og gode tilretteleggjarar. Venstre vil at Stad kommune skal vere heilt i landstoppen innanfor grøn næringsutvikling og stadutvikling. Innanfor rammene av klima, miljø og natur vil Stad Venstre legge til rette for vekst i næringslivet i Stad kommune. Vi satsar på næringsutvikling, gründerar, og meir samarbeid mellom kommune, skule og næringsliv.

Stad skal vere ein kommune der det er godt å vekse opp for born og unge. Venstre vil halde fram og styrke satsinga på kvalitet i skulen, og løfte ungdommen sterkare fram. Vi jobbar for ein skule med motiverte lærarar og elevar. Det skal være enkelt for ungdom å delta i aktivitetar og ha kontakt på tvers av bygdene.

Venstre vil sørge for at Stad kommune klarer å gi god omsorg til dei som treng det - når dei treng det. Vi skal gje rett hjelp til rett tid, og styrke folkehelse og meistring. Det skal vere godt å jobbe innen helse- og omsorgstenesta i kommunen.

Stad kommune skal vere ein stad med allsidige, spennande kulturtilbod og fritidsaktivitetar for alle. Stad Venstre vil jobbe for å styrke dei frivillige organisasjonane og få endå fleire aktive innanfor kultur- og organisasjonslivet. Idrett og friluftsliv er viktig for samhald, inkludering, meistring og folkehelse. Vi må også løfte arbeidet med ivaretaking og formidling av kulturminne.

Venstre vil knytte alle delar av kommunen sterkare saman. Bygdene treng sterke senter og sentra treng levande bygder. Alle vil vinne om vi får ein samla region i Nordfjord, der vi samarbeidar om forvaltning, vekst, utvikling og nye arbeidsplassar.