Ti nye nasjonalparkar

Områda Miljødirektoratet no skal utgreie har store verneverdiar og dialogen med kommunane så langt har tyda på at det er mogleg å få lokal aksept for å starte ein verneprosess. – Tap av naturmangfald på grunn av utbygging og inngrep er ei av dei største utfordringane i verda, men óg i Noreg tek denne bit-for-bit-utbygginga stadig meir natur. Derfor ønsker regjeringa no å sette i gang fleire verneprosessar der både dei lokale kommunane og Miljødirektoratet anbefaler at man legger ein nasjonalpark, seier Venstre-nestleiar og klima- og miljøminister Sveinung Rotevatn (V).

Tap av naturmangfald på grunn av utbygging og inngrep er ei av dei største utfordringane i verda

Fire heilt nye verneområder og nasjonalparkar i Vest-Noreg

Dei fire nye områda der regjeringa no vil arbeide mot å etablere nasjonalparkar er Sunnmørsalpane i Ørsta kommune, Hornelen i Bremanger kommune, Masfjordfjella i Alver og Masfjorden kommunar og Øystesefjella i Kvam, Samnanger og Vaksdal kommunar. Noreg har framleis område utan vesentlege tekniske inngrep med stor nok verneverdi til å fylle krava til nasjonalpark eller landskapsvern. Dette er nokon av dei viktigaste. – Nasjonalparkstatusen er det fremste kvalitetsmerke vi kan gi eit stykke norsk natur. At eit område blir nasjonalpark betyr at denne staden har heilt spesielle naturverdiar som vi meiner det er særs viktig at Noreg vernar og tar vare på for framtida, seier Rotevatn.

At eit område blir nasjonalpark betyr at denne staden har heilt spesielle naturverdiar som vi meiner det er særs viktig at Noreg vernar og tar vare på for framtida,

Miljødirektoratet og Statsforvaltaren vil saman med kommunane og grunneigarorganisasjonane i dei aktuelle områda sjå heilt konkret på kva for areal som er aktuelle å ha med i ei vidare utgreiing av vern som nasjonalpark eller landskapsvernområde.

Frå landskapsvernområde til nasjonalpark

Venstre og regjeringa vil óg be Miljødirektoratet gå vidare i arbeidet med å gjere om seks landskapsvernområde til nasjonalpark. Dei aktuelle er Lyngsalpan, Sylan, Trollheimen, Ålfotbreeen, Oksøy-Ryvingen og Flekkefjord og Listastrendene. Rundt Jotunheimen er det fleire stader verneverdiar som kan vurderast inkludert i nasjonalparken. I tillegg er 13 andre utvidingar av noverande verneområde aktuelle. Regjeringa vil be Miljødirektoratet og Statsforvaltaren ha dialog med kommunane områda ligg i for å finne fram til ei avgrensing ein kan greie ut nærare.

Inkluderande prosessar

– Det vil alltid vere ulike syn på nye verneområde. Nokre kan bli usikre på kva det kan bety for deira interesser, vi skal derfor sørge for ha gode prosessar der alle vil få kome med innspel, seier Rotevatn. Verneplanprosessane blir styrt av reglane i naturmangfaldlova og tek omsyn til medverking og involvering, og sikrar at områda som eventuelt blir verna fyller dei naturfaglege krava til vern. Å ferdigstille ein verneplan for ein nasjonalpark tek som regel 3 til 4 år.