Av Jan Arild Rømmen, 4. kandidat Sogndal Venstre (innlegget vart først publisert på Porten.no 29. august 2019)
Ekspertar som Torbjørn Dale i Sognefjorden Vel meiner det kan vere fleire årsakar til nedangen i fangstane, som klimaeffektar, næringstilgang i havet eller overfiske. Ein ser at utbyggjinga av vasskraft fell saman med fangstnedgangen, og dei største vasskraftanlegga finn vi nettopp i Indre Sogn.
Om vinteren blir det sleppt ut mange gonger meir vatn innerst i fjordsystemet som før reguleringa, mens utsleppa om sommaren er halvert. Dette kan påverka miljøet i dei øvste 10-20 meter i vassøyla, som endra saltinnhald og straumforhold.
Ein veit at egg av fjordtorsk i større grad blir vaska ut i ein “regulert fjord”, og kanskje kan det same gjelde andre artar. Endringane i vasskvaliteten kan også framskynda planteplanktonet sin blomstringssyklus, noko vil påverka dyreplankton og andre artar i næringskjeda – heilt opp til sild, brisling og artar som beitar på desse.
Kraftselskapa kunne endre vassføringa for å ta meir omsyn til fjordmiljøet, men etter kva eg forstår stoppar vasskraftregulantane sitt miljøansvar ved elveosen i fjorden. Medan forvaltninga av elvane ligg til Miljø- og klimadepartementet, er forvaltninga av fiskebestandane i sjø er lagt til Nærings- og fiskeridepartementet. Denne splittinga av forvaltningsansvaret gjer ikkje saka enklare.
Eg er kjent med at Sognefjorden Vel har påpeikt dette i høringar, og det vart i tillegg teken opp direkte med klima- og miljøminster Ola Elvestuen (V) i eit temamøte med Sogndal og Luster Venstre før sommaren.
Saka handlar ikkje berre om det marine miljøet i fjorden, men også reiseliv og potensialet for fisketurisme. Sogdal Venstre vil difor jobba vidare med saka. Me har tru på at det går an å kombinere bruk og vern. Me heiar på Visit Sognefjord som jobbar med sin berekraftsstrategi for turismen. Det kunne også vore interessant å sjå nærare på det kommersielle fisket av brisling og på forvaltinga av sjøkrepsbestandane.
I Sogndal Venstre vil me jobba for at alle kommunane rundt Sognefjorden må gå saman for å gjere vårt for å ta vare på miljø og verdiskaping i og rundt Sognefjorden.