Venstrelista er klar!

Fredag 29. mars leverte ordførarkandidat Jacob Nødseth inn Kinn Venstre si valliste. Det skjedde på kommunehuset i Måløy, der nye Kinn kommune har postadresse.

Kinn Venstre valte Jacob Nødseth som sin ordførarkandidat i oktober i fjor. Fredag 22. mars bestemte nominasjonsmøtet til Kinn Venstre resten av lista. Edvard Iversen frå Raudeberg blir som andrekandidat førehandsprioritert saman med Nødseth frå Florø.

-Nominasjonskomiteen har gjort ein god jobb med å finne flinke og engasjerte folk til lista. Vi har kvinner og menn frå nær sagt heile den nye storkommunen. På lista finn du unge og eldre, erfarne og ferskingar i politikken, frå ulike delar av næringslivet og
offentleg sektor, mange som er engasjert i frivillig sektor, i heile kommunen og i sine lokalsamfunn. Det er eit veldig godt utgangspunkt for å vere eit breitt folkeparti slik Venstre har tradisjon for å vere i både Flora og Vågsøy, seier ordførarkandidat Jacob
Nødseth.

-Vi er opptatt av å ikkje snakke om «dei» og «oss», men snakke om «vi» på tvers av dagens to kommunar. Det er viktig skal vi klare å realisere potensialet som er i nye Kinn. Det er ikkje likegyldig kven som sit med roret i den nye kommunen, og Venstre med Jacob i front har eit lag som er klart til å ta styring og både sette dagsorden i Kinn, og samstundes sette Kinn på dagsorden langt utanfor kommunegrensene, seier
andrekandidat Edvard Iversen. -Ei av våre viktigaste oppgåver er å snu den negative folketalsutviklinga i vår region, og då må vi gjere det attraktivt for unge menneske å bu her. Difor er det knallbra at så mange unge menneske har fått plass på lista vår. No gler vi oss til valkampen, seier dei to toppkandidatane.