Produksjon og sal av miljøvenlege bilar har eksplodert dei siste åra, no kjem ferjetrafikken etter. Mandag denne veka vart to elferjer døypte i Sogn og Fjordane. MF Gloppefjord og MF Eidsfjord er heilelektriske ferjer levert av Fjord1 som no skal i trafikk mellom Anda og Lote (E39). I byrjinga av mars vart det kjend at Fjord1 har signert to kontraktar for bygging av sju nye ferjer med null- og lavutsleppsteknologi. Fem av desse vert bygd i Noreg.
Arbeidsplassar og grøn vekst
– Vi held på å verta verdas utviklingssenter for maritim nullutsleppsteknologi. Ny teknologi og krav om mindre utslepp av klimagassar, skapar nye arbeidsplassar og betre tenester for folk, seier Bjørlo.
– Dette er ei utvikling som berre kjem til å fortsetja. No gjeld det ferjene, snart gjeld det hurtigbåtar, lasteskip og cruiseskip, seier Jon Gunnes, som er Venstres mann i Stortingets komité for samferdsel.
Dei peikar på at vi ser starten på ein grøn revolusjon, som kjem til å feie gjennom verda dei neste åra. Siemens i Trondheim skal levere elsystem til ferjer i heile verda. Trøndelag får batteri- og hybridferjer som reduserer utsleppa med 75 prosent. Verdas tre leiande produsentar av batterisystem for maritim sektor, planlegg no alle å etablere fabrikkar i Noreg (to i Trondheim og ein i Bergen).
Venstre-tema: Miljøvennlig transport
Grøn ferjetrafikk
Nyhenda om grøn ferjetrafikk har kome tett det siste året. Fjord1 har no over 20 elektriske ferjer i bestilling for levering dei neste to åra. Statens Vegvesen har blinka ut at den første hydrogen-ferja skal i ordinær rutedrift i Rogaland i 2021. Vegdiretoratet arbeider med ei standarløysing for lading av ferjer.
– Ferjene er enormt viktige for oss som bur i og langs dei norske fjordane. Dei er viktige for næringsliv, arbeidsplassar og skipsverft, seier Bjørlo.
Venstre-tema: Miljøvennlig sjøfart
Viktig for Venstre
Jon Gunnes slår fast at Venstre har styrka Enova sitt program for miljøvenleg samferdsel med over 400 mill. kroner i budsjettforlikene 2013-2017, utover regjeringa si satsing.
– Samstundes er det slått fast at alle dei store hamnene i Noreg skal ha landstrøm for cruiseskip. Stortinget har óg bedt regjeringa om at alle ferjeanbud i framtida set krav til null- og lavutsleppsteknologi når det er mogeleg, seier han.
– Grøne løysingar på sjøen var tema under regjeringsforhandlingane i januar. Der har regjeringa forplikta seg til å forsterke denne utviklinga. Mellom anna skal det stillast krav om utsleppsfrie eller fornybare løysingar i offentlege ferjeanbud. Vi skal gjera vårt for at denne positive utviklinga fortset, seier Jon Gunnes.
Regjeringsplattforma seier óg: «Videreutvikle programmet for grønn skipsfart til å omfatte nullutslipps- og hybridkonsepter for ulike fartøykategorier innen 2030. Etablere egne planprogrammer for å redusere utslipp innenfor marin og maritim sektor.»
Lynrask overgang
Bjørlo peikar på at sjøtransporten er i ferd med å få ein lynrask overgang frå ei fossil, sterkt forureinande transportkjelde til å verta fossilfri.
– Det er stas. At vi i vårt vesle hjørne av verda er med på å vera først i på det store som vil koma i åra som kjem: Ein transportsektor utan klimautslepp – som pløgjer stilt gjennom verdas vakraste fjordlandskap.