Helse og omsorg er der Leikanger brukar mestedelen av ressursane sine i dag. Med aukande krav til tenestene, nye oppgåver og fleire eldre, må vi spørje oss sjølve: Korleis utvikle tilbodet til beste for innbyggaren? Korleis jobbe og prioritere, slik at den eine tenesta ikkje stryper kvaliteten i den andre?
Venstre meiner vi må tenke nytt – snu tankar, arbeidsmåtar, organisering og sjå folka det gjeld. Omsorgsløftet må handle om god avlastning av pårørande, førebyggande trening, føre-var-tilpassingar heime hjå folk og tidleg rehabilitering når ting skjer. Det må handle om å ta vare på den frivillige innsatsen frå lag og organisasjonar, og her meiner vi ein frivilligsentral er eit godt grep. Ikkje minst handlar omsorgsløftet om tilbodet til demente. Vi treng å auke dagsentertilbodet og søke meir tilpassa buløysingar for desse og andre grupper, der sjukeheimen ikkje er det rette.
Venstre tek sosialt ansvar og set folk sjølv i sentrum. Det betyr frå reparasjon til førebygging med Venstre!