1. Hanna Menes
Hanna Menes er 24 år og vil i haust bli ferdig utdanna fengselsbetjent. Balestrand Venstre ser det som ein styrke å ha ein førstekandidat som både er ung og kvinne, fordi det jamt over er mangelvare i politikken. Hanna har engasjert seg i ungdomspolitiske spørsmål både lokalt og på fylkesplan og også delteke i kommunepolitikken i Balestrand. Ho er ein aktiv person.
2. Vidar Roseth
Vidar Roseth (56) har vore rådmann i Balestrand i 16 år og er no samhandlingssjef i Helse Førde. Som rådmann hadde han ein del verv i KS (kommunane sin organisasjon) både i fylket og på landsplan, og han kjenner kommuneforvaltninga godt. Vidar har vore spesielt engasjert i barnehage- og skuleutvikling og har no også fått god innsikt i helsetenestene.
3. Jarle Geithus
Jarle Geithus (58) er bankmann med hjarte for Balestrand. Han har vore med i politikken i kommunen i mange år. Også han har innsikt i den kommunale verksemda og m.a. gode føresetnader for å forstå tal, som er viktig når ein skal drøfte styringa av kommunen.
4. Jon Asbjørn Målsnes
Jon Asbjørn Målsnes (61) er fruktbonde som driv økologisk og har arbeidd i det kommunale systemet, innan helse og omsorg, i mange år. Som bonde har han hatt mange verv i ymse næringsorganisasjonar. Jon Asbjørn har lang erfaring som kommunepolitikar og har vore i kommunestyret i fleire periodar.
5. Merete Sande
Merete Sande (52) kjenner mange som ei drivkraft bak Friberg kino og ein god representant for dugnadsand og frivillig arbeid. Ho seier sjeldan nei til å ta eit tak når ho blir spurd, heller ikkje innan politikken.
6. Lars Sjøthun
Lars Sjøthun (60) er økonom og teamleiar i Visma. Han har fleire styreverv og har vore delaktig i gründerverksemd i Balestrand. I tillegg er også han engasjert i frivillig arbeid og Lars har vore venstrepolitikar i ei årrekke.
7. Marianne Herland
Marianne Herland (43) er førskulelærar og har sin yrkesmessige bakgrunn frå m.a. barnehagane i Balestrand. Marianne har t.d. gode føresetnader for vere med på drøftingar om kva som skal til for å sikre «ein god barndom som varer livet ut».
8. Kari Tordis Aarskog
Kari Tordis Aarskog (72) er pensjonist. Ho har vore med i politikken i Balestrand i mange år i ulike organ. Ho brenn for den kommunen som ho kjenner veldig godt og bidreg til at venstrelista har god variasjon i erfaring og kunnskapar.
9. Reidun Thorsnes
Reidun Thorsnes (61) er hjelpepleiar og har vore ein trufast medarbeidar i kommunen sine pleie- og omsorgstenester. Ho er blant dei som kan bidra til gode politiske diskusjonar om innretninga av helsetenestene, men har sjølvsag kunnskapar og meiningar utover det.
10. Britt Grimelid
Britt Grimelid (59) har vore sentral i Balestrand-politikken i mange år og har hatt ulike verv, ikkje minst medlem i formannskapet. Ho har god kjennskap til korleis det er å drive privat næringsverksemd og har dei siste åra hatt stillingar innan oppvekstområdet i kommunen.