Val 2015

Ved kommunevalet i 2011 fekk Eid Venstre heile 44% av røystene. Det førte til at Venstre fekk både ordførar- og varaordførarvervet, og heile 13 medlemmer i kommunestyret.

Venstre gjekk til val i 2011 på å styrke skulen, få planane om nytt omsorgssenter og ny fleirbrukshall i Eid “opp av skuffa” – og å satse sterkare på å legge til rette for å bu og drive næring i kommunen. Alt dette har vi arbeidd hardt med, og klart å få til, i løpet av valperioden. Bygginga av nytt omsorgssenter og ny fleirbrukshall startar hausten 2015. Skulen er styrka. Det er i gang arbeid med nye kommunale bustadfelt på Nordfjordeid og Stårheim, og nye næringsområde står no klart for bruk m a på Myklebust/Stokkenes.

Eid opplever etter mange års “stillstand” no ein vekst vi ikkje har sett på lenge. Nye, store næringsetableringar som skapar nye arbeidsplassar er på veg, og folketalet har for fyrste gong i Eid nokonsinne passert 6.000.

Ved valet i 2015 ber Eid Venstre om tillit til å halde fram arbeidet med å gjere Eid til ei endå betre kommune å bu i. Våre 35 listekandidatar – flest av alle parti som stiller til val i Eid – er klare til å ta Eid vidare!