– Så sant den siste utgreiinga som skal koma til hausten, ikkje konkluderer med at det er heilt utilrådeleg å heva kvikksølvflaskene, må me raskt koma i gang med å fjerna kvikksølvet, sa Breivik til avisa Strilen.
Regjeringa har eit hovudansvar for det, meiner han, men også opposisjonen må ta sin del av ansvaret.
– Me har ikkje pressa nok på i denne saka. Det står om truverdet vårt som miljø- og fiskerinasjon, seier han.
– Reint hav vedkjem alle, stemte Dørum i til avisa Nordhordland.
Testsenteret er viktig
Ein anna viktig sak i Nordhordland er testsenteret og den såkalla “månelandinga” på Mongstad. Brevik understrekar at testsenteret skal vidareførast i ei blågrøn regjering.
– Det er dyktige folk som jobbar på TCM, og kjem dei fram til ein metode for CO2-fangst som fungerer, vil det både kunna verta ein kommersiell suksess og vera viktig for miljøet, seier han til Strilen.
Styra pengebruken
– Slik som den økonomiske utviklinga har vore i det siste, trur eg kanskje me må handheva handlingsregelen endå strengare enn før, og pengane må berre brukast til investeringar innan samferdsel, forsking og teknologiutvikling, seier han.
Viktig næringsregion
Terje Breivik peikar på at Nordhordland er ein ekstremt viktig region der det skjer mykje verdiskaping. Han ønskjer å legga til rette for ein næringspolitikk som fremmer innovasjon og vekst i eksisterande næring.
– Fleire gründerar må koma gjennom nålauga. Vi meiner at næringshagane også bør ha tilgang på kapital, slik at denne kan fordelast lokalt, seier Breivik til avisa Nordhordland.
– Det er viktig å få på plass ordningar som gjer at gründerar og sjølvstendig næringsdrivande har same sosiale tryggleiksgodar som alle andre, seier Dørum.
– Ein skal sleppa å snubla fordi det skjer noko uføresett i livet, seier han.
Ferjefri E39, NH-pakken og nedkorting av transporttida til Europa er også tema som Breivik og Dørum sette fokus på då dei vitja Knarvik onsdag.