– Me ynskjer ei lågare arbeidsgjevaravgift med mindre variasjonar mellom kommunane, seier Knut Olav Nestås, leiar i Voss Venstre og forslagsstillar i morgondagens «Hordaland».
– Redusert arbeidsgjevaravgift er eit verkemiddel som alt vert nytta nokre stader i landet for å skapa fleire arbeidsplassar. Me vil at dette prinsippet skal gjelda over heile landet. For småbedrifter kan arbeidsgjevaravgifta vera det som hindrar ei nytilsetjing, seier Nestås, som sjølv jobbar som trafikklærar i ei småbedrift og som dagleg leiar i ei lita kursbedrift.
Partiet sin fyrstekandidat i Hordaland, Terje Breivik frå Ulvik, støttar framlegget. — Dette er ein del av vår heilskaplege skattereform. Me ynskjer mindre skatt på arbeid og investeringar og meir avgifter på ureining. På denne måten tek me næringslivet inn i ein grøn og berekraftig økonomi.
No går kampen vidare til landsmøtet i april, der stortingsvalprogrammet skal vedtakast. — Me har sjølvsagt tru på vossagjennomslag i Venstre, seier Breivik.
Les saka i avisa «Hordaland» for tysdag 19. februar.