Fylkespolitikarar frå AP, SP, Venstre og SV har vore vakne lenge og sett kva som er i ferd med å skje med fylket vårt: At det lett kan hende at det er Østerdalen som blir aktuell for høgfartsbane medan Gubrandsdalen blir tapar — og dermed også Møre og Romsdal. Dei har fremja forslag og stemt positivt for høgfartsbane i mange omgangar. Det har også fleire gongar vore åtvara mot at vi kunne bli akterutseilte.
Men Frp-gruppa på fylkestinget har sagt nei,nei,nei – antan dei har vore leia av Oskar Grimstad eller Frank Sve. For det første har dei stemt mot alle gongar det har vore fremja uttale om å få høgfatrtsbane til Møre og Romsdal, så har dei tala sterkt imot hurtigtog frå talarstolen i fylkestinget og frå representantplass i fylkestuvalet, for å avslutte med å røyste mot at fylket skulle løyve pengar for å gjere utgreiinga om høgfartsbane mellom Dombås og Ålesund , noko som kan få fylket vårt på banen.
Det er vanskeleg å få det til å stemme at han no skal bli den store pulsfølaren i Oslo og sende varsku oppover her til oss. Han seier rett nok i intervjuet at han har eit ambivalent forhold til jernbanesatsinga – og at dette er ein skinnmanøver frå venstresida i norsk politikk for å tildekke dei store manglane innan norsk samferdsel. På denne måten tilstår han at han ikkje akkurat har ivra for høgfartsbane. Men det er ikkje akkurat ambvivalens Frp har uttrykt i alle saker som har handla om høgfartsbane. Det har vore klart og overtydeleg avvist. Og seier ein nei takk til å stige om bord etter mange invitasjonar , så er det vel litt rart å skulde dei andre som har gått om bord og funne seta sine for at ein sjølv vart for sein. Det er ikkje til å tru!
Grimstad peikar på at Møre og Romsdal lir av at ingen på Møre benken har sete i transport- og kommunikasjonskomiteen. Men i denne saka kan vi alle fall vere glad for at ingen frå Frp i Møre og Romsdal er med der.
Gunn Berit Gjerde
Fylkestingsrepr. Venstre