Vi får håpe at Mørebenken ikkje har tenkt seg så veldig lenge og grundig om før dei slutta seg til Rauma Energi sin omkamp om verneplanen tidlegare i år. Vi aner at Jenny Klinge i SP kanskje tenkjer annleis etterkvart. Måtte berre alle snu slik at vi kan få ei fornying av Verma kraftverk som både gir mykje meir kraft og let verneplanen vere i fred. Det er utarbeidd planer som gjer at kraftverket kan produsere nesten like mykje kraft som Storhaug-alternativet utan å gripe inn i dei områda som er omfatta av verneplanen.
Venstre har kome med klar tale i alle åra det har vore snakk om Storhaug-alternativet som Rauma Energi vil ha. Vi godtar ikkje at verneplanen blir tukla med, men vi helsar velkomen ei fornying og endring som gir meir kraft utan å rokke ved verneplanen!
Vi må også få lov å rose ordførar Torbjørn Rødstøl som også har vore krystallklar i denne saka. Han har vist at han kan forvalte andre verdiar enn dei han kan direkte rekne om i kroner og ører for kommunen. Kanskje han får like mykje att i reiselivsamanheng som han ville ha fått att i indirekte inntekter frå Rauma Energi for nokre få kwh meir. Rauma kommune er ein stor reiselivskommune. Naturvern er viktig i denne samanheng, i nasjonal samanheng for å ta vare på det biologiske mangfaldet og for folk som er fastbuande i Rauma. Alt skal ikkje vere til sals !
Venstre har peika på andre måtar å skaffe meir kraft til fylket slik at grensene fir eige prisområde kan viskast ut og kraftprisane blir som elles i landet.
Arne Steffen Lillehagen, Gruppeleiar i Rauma Venstre
Gunn Berit Gjerde, gruppeleiar i Møre og Romsdal Venstre