Av Jan Kløvstad, gruppeleiar i Arendal Venstre
I budsjettmøtet 11. desember siterte eg kommunelovens paragraf 44 med klare krav om budsjett i balanse for heile fireårsperioden. Eg spurte om Frp og Pensjonistpartiets fellesforslag var lovleg, sidan forslaget mangla både utgifter og inntekter for åra 2010-2012. Eg spurte kommunerevisor og rådmann kva fylkesmannen ville gjere om budsjettforslaga frå Frp, Pensjonistpartiet — og også Høgre — blei vedtatt. Svaret frå rådmannen var klart: "Fylkesmannen vil sende budsjettet i retur."
Det tener Høgres representantar til ei viss ære at dei såg ned i bordet og tidde heilt stille da Venstre stilte spørsmålet, og at blikket var flytta nærmare golvet da rådmannen ga sitt klare svar.
Som bystyre har vi ansvaret for å sørge for tenester og utvikling for 41 000 innbyggarar i kommunen. Vi er arbeidsgjevarar for fleire tusen tilsette, og vi har ansvar for store verdiar.
Da må vi som folkevalte oppføre oss ansvarleg.
Først leverte FrP og Pensjonistpartiet eit budsjettforslag i strid med kommuneloven, så forklarte Anders Kylland at Frp støttar rådmannens forslag for 2010-2012 (som mellom anna inneheld solid auke av eigedomsskatten). Neste steg var at partiet forsøkte å le seg vekk frå det pinlege i bystyremøtet. Foreløpig siste episode er at Anders Kylland hevdar at rådmannens budsjettforslag er i strid med norsk lov.
Rådmannens forslag er i strid med norsk lov? Kvifor i all verda hevda da den same Anders Kylland i bystyremøtet at Frps forslag for 2010-2012 er identisk med rådmannens forslag for åra2010-2012? Og kva i rådmannens forslag er ulovleg, Frp?
God jul — med eller utan saldert budsjett, innanfor eller utanfor kommuneloven.