Vil du sende oss ut av Arendal, Arne Austenå?

Arendal skal vere ein åpen by, ein by der vi seier velkomen til folk frå heile verda, ein by som gir både innfødte og dei som vil kome hit sjanse til å vere med på å bygge framtidas Arendal.

Vi skal vere romslege nok til å ta imot flyktningar som treng hjelp, folk som flyktar frå krig, fattigdom og undertrykking. Vi skal vere djupt takksame for all den utanlandske kompetanse, kreativitet, arbeidskraft og arbeidsglede vi er blitt velsigna med dei siste åra.

**OBS! Denne artikkelen ble første gang publisert for 17 år siden.**

Publisert av Arendal Venstre


Av Jan Kløvstad,
leiar i Arendal Venstre

Jan Kløvstad

Foto: Marianne Drivdal

FrPs Arne Austenå gir inntrykk av at innvandrarar flest ikkje vil jobbe. Eg kjenner mange velkvalifiserte innvandrarar som søker, søker og søker, men ikkje kjem i jobb. Det er ille, for vi har inderleg bruk for alle. Heldigvis ser vi fleire og fleire arbeidsplassar som har nytte og glede av våre nye borgarar. Ei natt på sjukehuset møtte eg russisk, polsk og norsk lege og sjukepleiarar frå Norge, Irak, Tanzania, Polen og Tyrkia. Alle var høgt kvalifiserte. Utan dei stoppar Helse-Norge.

Vi skal ikkje "avvise ressurssvake innvandrergrupper", slik gruppeleiar Arne Austenå i Arendal FrP vil (Agderposten 8. april). Det er hjartelaust og umenneskeleg. Venstre vil støtte dei som treng det mest, ikkje avvise forfølgte og undertrykte barn og vaksne ved grensa fordi ei krigsmakt har hindra dei i å lære å lese.

I valkampen i fjor haust sa Arne Austenå (folkemøtet i bystyresalen) at vi berre skal ta imot dei nye borgarane som "kommer hit på naturlig vis".

Eg er født i Tønsberg, kona mi i Bærum, ungane våre er født i Grønland og Ecuador. Er vi komne til Arendal på naturleg vis, Arne Austenå? Vil du sende oss ut av Arendal?

Jan Kløvstad
leiar i Arendal Venstre

**OBS! Denne artikkelen ble første gang publisert for 17 år siden.**